بەناوی خوای پەروەردگار و بەخشندە...

دەستپێکی هەموو کارێک بەناوی خوایە، ئێمەش بەناو و پشتیوانی ئەوەوە دەستمان پێکردووە و بەردەوامین. ئەم سەرمایەی ئێستا هەمانە بەرپرسیارێتی هەردوو دونیای خستووینەتە ئەستۆ، بۆ ئەوەی ڕاستگۆیانە خزمەتی مرۆڤ، کۆمەڵ و نەتەوە و شار و ناوچەکەمانی پێبکەین. بەر لە (٥٠) ساڵ، باوکی خۆشەویستم (حاجی محێدین ڕەشەسور) لە دوکانێکی بچووکی ئەم شارە حەیاتەوە دەستی بە کاری بازرگانی کرد. سوپاس بۆ یەزدان و ڕێنماییەکانی باوکم، ئێستا نەجمەدین گروپ ناوێکە نەک لێرە و عێراق، بەڵکو لە تەواوی ناوچەکەدا جێی متمانەیە.

باوکی پایەبەرز و بە ویژدانم بازرگانێک نەبوو، تەنیا ئارەزووی دەوڵەمەندبوون بکات، بەڵکو بەردەوام ئێمەی وا پەروەردەکردووە بە ویژدان و خەمخۆرییەوە سەرمایەگوزاری بکەین. لە کاتی ئابڵوقەی سەر هەرێم، پێداویستی و خۆراک دابین بکەین، شارو وڵاتمان خۆشبوێت و لە دۆخە دژوارەکاندا لێرەبین و خزمەت بکەین و دەستبەرداری خەڵک و خاکمان نەبین، هەوڵی بوژاندنەوە و گەشەسەندنی بدەین، چونکە سەرمایە بۆ سەرمایەگوزارییە، لەم ئامانجە مرۆیی و ئیمانییەوە کە خستنەگەڕی سەرمایەیە بۆ کار و خزمەت، سەرچاوەی بەردەوامی گەشەسەندنی کاری بازرگانیمان بووە. سوپاسگوزاری یەزدان و خەڵک و وڵاتمانین کە ئێستا نەجمەدین گروپ متمانەیەکی فراوان و گەورەی لە ئاستی ناوچەکە بەدەستهێناوە و بەردەوامیش لە فراوانبوون و گەشەسەندندایە.

چیرۆک و مێژووی سەرمایەگوزاری نەجمەدین گروپ هاوڕێ و هاوتەریبە بە ژیانسازی شارە حەیاتەکە و هەرێم و عێراق و تەواوی ناوچەکە. ئەمڕۆ ئێمە خاوەنی زنجیرەیەک کۆمپانیاین لە بوارە جیاوازەکانی بیناسازی، خۆراک، گەشتوگوزار و بریکاری براندە جیهانییەکان؛ کارمان بۆ بەجیهانیکردنی نیشتمان و بەنیشتمانکردنی جیهان داوە. ئەو پرۆژانەی ئەنجامی دەدەین لە کوالێتییەکی بەرزی جیهانیدان. سوپاس بۆ خوا چەندین یەکەمبوون و یەکەمجارمان تۆمارکردووە، هەر لە بەکارهێنانی سیستمی سەلامەتی (تونێل شەتین) و وەرگرتنی بریکارنامەی براندی جیهانی (Profilo)ی سەر بە کۆمپانیای دیاری ئەڵمانی(BSH)، تا کۆمپانیای سانتا کلاراو تازەترینیان کردنەوەی سەنتەری بازرگانی (دانیا)یە.

سەرەتا ئێمە بە هاوردەکردنی پێداویستییە سەرەکییەکانی هاونیشتمانیان دەستمان پێکرد، بۆ گەشەدان بە سەرمایەی وڵاتمان هەناردەی خوری و پێستەمان بۆ دەرەوەی وڵات کرد. پاش ڕووخانی ڕژێم و گۆڕانکارییە سیاسییەکان لە هەرێمی کوردستان و عێراق، ئازادی و کرانەوەی کاری بازرگانی و ئاوەدانی، گوژم و هەنگاوی بەرزی تۆمارکرد، بە شانازییەوە نەجمەدین گروپ پشکی شێری لەم کرانەوە و ئاوەدانییە بەرکەوتووە. لە ئێستادا نەجمەدین گروپ کۆمەڵگەیەکی بازرگانی فراوان و گەورەی وەبەرهێنانە، بەتایبەت لەبواری بیناسازیدا لە هەرێم و عێراق، باشترین کارگەکانی کۆنکرێت و خشتمان هەیە، چەندین پرۆژەی نیشتەجێبوون و مۆڵ و باڵەخانەمان بونیادناوە، لەوانە: (ڤێلاکانی دانیا، شاری گۆیژەی سێ، شاری پزیشکان و میران ستی، دانیا ستی- کەرکوک، دانیا ستی - بەغداد و نەجمەدین ستی -کوت...)، هەروەها (باڵەخانەی کوردستان مۆڵ، هۆتێلی پێنج ئەستێرەی ڕامادا...)، لەگەڵ ئەوەشدا بایەخمان بە ژێرخان و سەرخانی وڵات داوە، دروستکردنی عەلوەی نوێی سلێمانی کە باشترین ئامێری ساردکەرەوەمان بۆ دابین کردووە، سیستمی ئاودێری و سەوزکردنی پارکی هەواری شارمان لەئەستۆگرتووە، کە گەورەترین زۆنی سەوزایی شارە. بە شانازی و شادمانییەوە دەتوانین بڵێین ئێستا نەجمەدین گروپ ناوێکە لەسەر زار و خەڵک خۆیان شاهیدمانن، ئەمەش بەرپرسیارێتیمان نەک لەخۆبایبوونمان بۆ ئایندەی کار زیاتر دەکات.

وەک نەجمەدین کلیلی بەردەوامی سەرکەوتنەکانم لە کاری پێکەوەییدا بینیوەتەوە. بە پێزانی و سوپاسەوە پشتبەست بە کاری هاوبەش و گروپ، بە ستافێکی گەورە و فراوان لە ئەندازیار، دیزاینەر، تەکنیکار و کرێکاری دڵسۆز بەردەوامین لە بوژاندنەوە و خزمەتکردنی شارو وڵات و ناوچەکەمان. نەجمەدین گروپ ئیمپراتۆری بونیادنان و داهێنان، بەڕێزەوە لەکاری هەر سەرمایەدارێک دەڕوانێت، کەس بە ڕکابەری خۆی نازانێت، چاومان لە ئاسۆیە و خۆری دواڕۆژی وڵاتین.

خوێنەر و بینەری بەڕێز لەم کەتەلۆکەدا بە نووسین و وێنە، لە سەرجەم بەش و لقەکانی نەجمەدین گروپ ئاشنات دەکەین، بۆ وردەکاری پرۆژە و یەکەکانی نیشتەجێبوونیش کەتەلۆکی تایبەتمان هەیە و دەتوانیت لێیان سوودمەندبیت.